ඉංදියාවේ බෞද්ධ සිද්ධස්ථානයන් හි විස්තර පුවරු සිංහල භාෂාවෙන් ප්‍රදර්ශනය කිරීම සාංචි පුද බිමෙන් ඇරඹේ

ඉංදියාවේ පුරාවිද්‍යා දෙපාර්තමේන්තුව යටතේ පාලනය වන  ඉපැරණි  බෞද්ධ සිද්ධස්ථානයන් හි නාම පුවරු සහ විස්තර පුවරු සිංහල භාෂාවෙන් ද ප්‍රදර්ශනය කිරීමට  ඉංදීය මධ්‍යම රජයේ සංස්කෘතික හා සංචාරක අමාත්‍යංශය තීරණය කරයි.මෙතෙක් එම පුවරු පැවතියේ හින්දි සහ ඉංග්‍රීසි භාෂාවන් ගෙන් පමණි. ඒ අනුව බුද්ධගයාව, කුෂිනාරා,වරනාසි,ඇතුළු ලාංකික බැතිමතුන් බහුලව පැමිණෙ ප්‍රධාන බෞද්ධ සිද්ධස්ථානයන් හි නාම සහ විස්තර පුවරු සිංහල භාෂාවෙන් ද සවි කරන බව  ඉංදීය මධ්‍යම රජයේ සංස්කෘතික හා සංචාරක අමාත්‍ය ප්‍රහ්ලාඩ් සිංග් පටෙල් මහතා (Prahalad Singh Patel)පවසයි. ඒ මහතා මේ බව ප්‍රකාශ කළේ මෙම වැඩසටහන මධ්‍ය ප්‍රදේශ් හි සාංචි ස්ථූප පුදබිමෙන් පසුගිය (23) දා ආරම්භ කරමින්ය.

සාංචි චේතියගිරි විහාරයේ වාර්ෂිකව පැවැත්වෙන සැරියුත් – මුගලන් අග්‍රශ්‍රාවක ධාතුන් වහන්සේලා වන්දනා ප්‍රදර්ශනයේ සමාරම්භක උත්සවයට  සමගාමීව අමාත්‍ය ප්‍රහ්ලාඩ් සිංග් පටෙල් මහතා මෙම සිංහල භාෂා විස්තර පුවරු විවෘත කළේය. සාංචි චේතියගිරි විහාරාධිපති හා ජපානයේ ප්‍රධාන සංඝනායක අතිපූජ්‍ය බානගල උපතිස්ස නා හිමියන්ගේ ඇරයුමෙන් පටෙල් මහතා මෙම උත්සවයට සහභාගි විය. මේ පිළිබද අදහස් දැක් වූ බානගල උපතිස්ස නා හිමියන් ප්‍රකාශ කළේ මීට මාස කිහිපයකට පෙර සාංචියට පැමිණි පටෙල් ඇමතිතුමා , සාංචියට පැමිණන බහුතරය සිංහල බෞද්ධයන් නිසා , මෙම පුවරු සිංහලෙන් සවි කිරීමට උපදෙස් දුන් බවය. මෙම අග්‍රශ්‍රාවක ධාතුන් වහන්සේලා වන්දනා ප්‍රදර්ශනයේ සමාරම්භක උත්සවයට මධ්‍ය ප්‍රදේශ් අධ්‍යාපන අමාත්‍ය ප්‍රභූහරන් චෞද්රි මහතා ද( Prabhuram Chaudhary) එක් විය.

සාංචි පුද බිම යනු සර්වඥ ධාතුන් වහන්සේලා සහ සැරියුත්-මුගලන් අග්‍රශ්‍රාවක ධාතුන් වහන්සේලා එකම ස්ථානයක වැඩවසන ලොව එකම පුද බිමය.

Leave a Reply

This site uses Akismet to reduce spam. Learn how your comment data is processed.